Um Þorlákskóla
Þorláksskóli er sérhæfður grunnskóli fyrir einhverf börn í Garðabæ. Skólinn hefur starfsemi haustið 2026 og býður upp á einstaklingsmiðað nám í öruggu, fyrirsjáanlegu og skynvænu umhverfi.
Markmið okkar er að skapa skólasamfélag þar sem hvert barn fær að njóta styrkleika sinna, áhugasviða og möguleika. Við sjáum einstaklinginn í heild og mótum nám, stuðning og umhverfi út frá þörfum hvers nemanda.
Við sjáum hvern nemanda
Nemendur Þorláksskóla eru ólíkir og þurfa ekki allir það sama. Sumir þurfa skýra dagskipan og mikinn sjónrænan stuðning. Aðrir þurfa rólegra umhverfi, aðrar leiðir til samskipta eða meiri tíma til að byggja upp traust og öryggi.
Við mætum hverju barni þar sem það er statt og leggjum áherslu á að skapa umhverfi þar sem það getur tekið þátt, lært og vaxið á eigin forsendum.
Meira en skóli
Þorláksskóli er fyrsti áfanginn í stærri framtíðarsýn um samfellda og sérhæfða þjónustu fyrir einhverft fólk og fjölskyldur þess.
Til framtíðar viljum við byggja upp ráðgjöf og handleiðslu fyrir fjölskyldur, skóla og sveitarfélög, fræðslu og þekkingarmiðlun, snemmtæka þjónustu á leikskólastigi og TEACCH-þekkingarsetur fyrir fullorðna.
Markmiðið er að sérhæfð þekking og stuðningur verði aðgengileg þar sem þeirra er þörf – einnig fyrir börn sem stunda ekki nám við Þorláksskóla.
Við erum að opna skóla í dag en byggja upp þjónustu til framtíðar.
Rekstur skólans
Þorláksskóli er rekinn af Jónsvegi ehf., óhagnaðardrifnu félagi sem var stofnað um uppbyggingu og rekstur skólans og tengdrar þjónustu.
Allur rekstrarafgangur er nýttur til að efla skólastarfið og styðja við áframhaldandi þróun þjónustu fyrir einhverft fólk og fjölskyldur þess.
Upphafið
Þorláksskóli er sprottinn af ást foreldra, reynslu af kerfinu sem á að grípa og trú á að hægt sé og nauðsynlegt sé að gera betur.
Skólinn er tileinkaður Jóni Kristjáni, sem er 5 ára og einhverfur og öllum þeim einhverfu börnum sem þurfa meiri skilning, stuðning og tækifæri til að þroskast á sínum forsendum.
Í dag bíða hundruð barna eftir þjónustu sem þau þurfa strax. Fjöldi einhverfra barna fá ekki snemmtæka íhlutun og missa þannig dýrmætan tíma í þroska og námi.
Núverandi skólar eru yfirfullir og skortir verulega sérhæfða aðstoð til að mæta einhverfum börnum sem þurfa mikinn skilning og stöðugleika en því miður falla þau alltof oft á milli kerfa.
Þorláksskóli er framlag í átt að lausn við gífurlega mikilli þörf sem er uppi og von um að enginn verði skilinn eftir.
Við ætlum að vera hluti af lausninni.
